عيزت وانا اقول اليوم ولا باجر بتغير الحال بس ماكو فايده
وبعد تفكيرعميق قررت وما باذني ماي اني انتقم من اللي يضايقني لا تقولون
طوفي احنا بشهر الخير والرحمه والمغفره لا بس خلاص
بلغ السيل الزبى انا معاكم ان شهر رمضان من افضل الشهور بس انا تحملت وايد وصبرت اكثرمن اللازم
كل يوم اقول الوضع بيتغير بس للاسف اشوف السالفه مصخت وايد ويوم عن يوم احترق من داخلي مثل البركان
واحاول اهدي نفسي بس الحين خلاص تحملوا ما اييكم ياللي ضايقتوني صارلي فتره افكر بطريقة الانتقام انا ادري واحس ان اللي بيقرى هالبوست بيقول يمه شفيها حياة صايره شرانيه وعدوانيه !!
بس شسوي مو بيدي خلاص راح عمري وانا اقول اليوم وباجر بتتغير الامور بس ماكو اي استجابه بس بصراحه في البدايه كنت محتاره بطريقة الانتقام هل استخدم فيها سجاجين وصواطير ولاطق عادي علشان يحسون بالم وجود ايوزون عن اللي يسونه بس قلت ماكو الا غيراحقر لان مثل ما يقولون الحقران يقطع المصران ..
بس يا نفس توبي كل ما حاولتي توديني لطريج ولشي غلط بحقرج وبخليج تنقهرين
وانتي بعد يا عيوني ان حسيت مجرد احساس بتشوفين شي مامنه فود بصكر عيني وبنام عناد عليج
واذني نفس الشي لج نصيب من الانتقام ان حسيت بخاطرج تسمعين شي مالج شغل فيه بحط ايدي عليج ومابخليج تسمعين علشان تحترين ونفس الحال للساني وايدي وريولي كلكم ما راح تنحاشون يايكم الدور
شسوي لازم انا امشيكم على اللي ابيه واشوف فيه الخير لي ولكم وبما ان احنا بشهر الخير والتوبه ببتدي معاكم وباذن الله راح تكون الانطلاقه من الحين وامشي على هالطريج لي ما الله ياخذ امانته ..
وبالاخير احب اوجه نداء للي يبي ينتقم حيالله
ونصيحه فرصتكم الحين
لازم تغيرون انفسكم دام الايمانيات زايده وعساها دوم زايده بهذا الشهر ولا بدونه ..
