موضوعي اليوم باين من العنوان عن توتي فروتي ...
مين فينا ما بيعرف توتى فروتى
بصراحه اللي مايعرفك ما يثمنك ,,
نبذه صغيرونه عنه :
توتي فروتي ياجماعة الخير اهو عباره عن حلاو على شكل فراشه صغيرونه بعدة الوان منها الاخضر والاحمر والاصفر او على شكل سيارات صغيره وبنفس الالوان .. ادري بتقولون الحين كاتبه موضوع كامل علشان حلاو !!!!
برد عليكم وبقولكم اي وانا بكامل قواي العقليه : )
انا يا جماعة الخير قصتي قصه مع توتي فروتي ..
بسببه انحطيت بموقع لا احسد عليه وكان هذا في سنه ولا اقول ماني قايله : ) اخاف اكتب وتقولون عني كبيره هههه المهم كنت في المرحله الابتدائيه من جم سنه يعني : ) بالتحديد في مدرسة ام الخير الابتدائيه في الصف الثالث الابتدائي
كنت ب 3 /1 ,, طبعا الاهل الله يجزاهم خير شارين لي جنطه الاكل الكل يعرفها الجنطه المربعه وداخلها مطارة الماي كنت احط مطارة الماي بالفريزر من الليل لي الصبح اخذه علشان يكون بارد لي نهاية الدوام ايام .. حلوه كانت ..
المهم من ضمن الاغراض بجنطة الاكل صديقي الصدوق وحلاوي المفضل توتي فروتي .. وكنت ما اصدق متى تصيرالفرصه علشان اكل حلوياتي واوري البنات اغراضي بعد سوالف اليهال : ) المهم خلصت الفرصه وما مداني اكل حلوياتي
وبالاخص توتي فروتي ,, بدت الحصه الثالثه ودرسنا والحصه الرابعه كان احتياط عندنا ,, دخلت المدرسه علينا وقالت احتياط سوا اللي بتسونه بس بدون صوت .. اللي تطلع كتبها تحل واجبتها .. واللي تطلع كراستها وتلون .. واللي تلعب مع البنات لعبة اللص والجلاد .. ادري بتقولون من وين مطلعه هالسوالف المغبره هههههه بس عاد من جم سنه هالحجي مو بعيد وايد ترا .. : ) المهم .. انا طلعت حلاوي وكنت حاطته بالدرج .. عاد طاولات قبل كانت عن طاوله وحده بس حق شخصين وكل واحد له درج خاص فيه .. حطيت حلاوي بالدرج وقعدت اكل شوي شوي عاد انا مسكينه علبالي
عادي ناكل طاحت علي المدرسه ونادتني .. قالتلي تعالي قاعده تاكلين من الخرعه بلعت الحلاوه ورحت لها .. قالت في شي بحلجج قلت لها لا .. وانا صاجه خو من خرعتج بلعتها جان تقولي بطلي حلجج بطلته عاد تعرفون الحلاو فيه ميزه مو شوي ساعات يتلزق الضروس شافت بقايا حلاو هههه وقالت لي تجذبين بعد ولا ..........
طاخ طيخ طوخ
صكتني بكف فرة ويهي فر ما انسى هالكف طول عمري الله يسامحها اصابعها طبعت بخد طفله بريئه مثلي : (
بس من عقب هالكف عرفت وتعلمت مو يقولون كل طراق بتعلومه : )
احترم اللي جدامي وكل شي له وقته ,, الاكل له وقت والضحك له وقت والجد بوقت خاص فيه بصراحه كله منك يا توتي فروتي انطقيت بسبتك .. بس فوق كل هذا شكرا لك تعلمت من هالموقف وانقرصت منه حلو الواحد يتعلم من المواقف اللي تمر بحياته ولا شرايكم :)
