أحاول جاهداً إبعاد كل مشاكلى و أفكارى الخيالية عن رأسى و التركيز فقط فى الأعمال التى سأقوم بها
أصل لمرحلة من التركيز لدرجة إننى لا أرى الناس من حولى ,فقط غاية إهتمامى هو الوصول إلى وسيلة مواصلات تقلنى إلى عملى
وصلت الأن إلى الشارع الرئيسى عبرت الحارة الأولى ووصلت إلى جزيرة الطريق منتظراً فرصة أخرى لعبور الحارة الأخرى و يستوقف إنتباهى شابة ذات شعر أسود منسدل على كتفيها قادمة من الإتجاه الأخر تريد عبور الشارع و تبتسم
من زاويتى أستطيع أن أرى أثر الإبتسامة على ركن شفتيها
أنظر للناحية الأخرى لأرى الشخص المحظوظ الذى نال هذه الإبتسامة ,لا أجد أحد يتلقى الإبتسامة
مجرد مارة ,بائع جرائد,تلميذ فى طريقه للمدرسة
إبتسامتها تعلق فى ذهنى فأعبر الطريق عائداً إلى حيث كنت و أسير خلفها
و
أنا:ممكن لحظة واحدة من فضلك
الفتاة "تنظر لى فى دهشة":أيوة
(أنتبه أن الفتاة تمتلك وجهاً ملائكيا مع بعض النمش البسيط)
أنا:حضرتك كنتِ بتضحكى ليه
الفتاة"ترمقنى الأن بإستهجان شديد:وإنت مالك و حضرتك بقى بتراقبنى ولا إيه
أنا:لا والله أنا بس لقيتك بتضحكى ,حبيت أعرف أنتِ بتضحكى ليه,من فضلك جاوبى سؤالى وماتستغربهوش
الفتاة:هوا الضحك حرام ولا إيه؟؟؟؟ ولا القانون بيعاقب دلوقتى اللى بيضحكوا فى الشارع
أنا:من فضلك حاولى تفهمينى أنا فعلاً يهمنى أعرف إيه هو سبب ضحكتك
الفتاة:ليه؟؟؟؟؟
أنا:الصراحة مش حقدر أوصلك الفكرة بس أنا بحب دايماً بأهتم إنى أعرف أسباب الحالة أكتر ما أشوف الحالة نفسها
الفتاة:يا سلام إنت شكلك كده بتستهبل
أنا:ماشى يا ستى بصى الضحكة اللى طلعت منك دى كانت من القلب إنت أكيد كنتى بتفكرى فى حاجة حصلتلك أو بتتوقعى حاجة حتحصل, محدش مأثر على ضحكتك غيرك
الفتاة:إنت أكيد شفت ناس قبل كده بتضحك فى الشارع ,عُمرك سألت حد السؤال ده؟؟؟؟
أنا:الصراحة دى أول مرة ,أنا ساعات باشوف ناس بتضحك ,بس دى أول مرة تيجيلى الجرأة واسأل حد
الفتاة:طيب لو شفت حد ماشى بيعيط أو زعلان حتسأله عن السبب
أنا:عمرى ما فكرت فى الحكاية دى يمكن علشان أغلبية الناس بتبقى ماشية زعلانة أصلاً
الفتاة:طب إفترض أنه كان فيه إتنين معديين أنا وراجل عجوز وإحنا الاتنين بنضحك كنت حتسأل مين فينا
أنا:ده سؤال مقدرش أرد عليه غير لما أبقى فى الموقف نفسه
الفتاة:تصدق بقى إن الراجل العجوز حتبقى ضحكته أحلى
أنا:إشمعنى ؟؟؟؟؟
الفتاة:إشمعنى علشان العجوز ده ما بيضحكش من فراغ ,أكيد هو شاف كتير فى الدنيا علشان كده ضحكته طالعة من القلب, لكن البنت أخرها ممكن تضحك لما تفتكر كلمة كان قالهالها الولد اللى بتحبوه,مقلب عملته فى واحدة صاحبته
أنا:كلامك معقول جداً
الفتاة فى تحمس :إيه رأيك لو سألنا أى حد معدى بيضحك ,إنت بتضحك ليه
أنا:مع إنى عارف إننا مش حنلاقى بس نجرب
الفتاة:لأ إطمن حنلاقى
نبدأ مع رجل مبتسم يسرع الخطى: لو سمحت بعد إذن حضرتك ممكن نعرف حضرتك بتضحك ليه؟؟؟؟
الرجل:الساعة 8:30
أضحك أنا و الفتاة على رده التلقائى
أنا :أكيد إفتكرنا بنسأل على الساعة
بائع الجرائد:طبيعة المهنة يا بيه لازم أضحك على طول فى وش الزبون
تلميذ ذاهب إلى المدرسة:عندنا حصتين ألعاب النهارده
فتاة:النهاره عيد ميلادى و خطيبى عازمنى بره
شاب:حسن شحاتة أخد حسام حسن المنتخب وساب بلال
رجل:مكتوب إن حسن صقر صلى الجمعة مع نظيف فمسكه المجلس الأعلى للرياضة
شاب:لأ أبداً إفتكرت واحد صاحبى وهو بيقولى إنه شاف فيلم إسمه الخاتم الملك طلع قصده ملك الخواتم
رجل:من الحزن باضحك
ولد صغير:حد يشوف قمر زيك على الصبح ومايضحكش
رجل عجوز:إيه ده أنا كنت بضحك ماخدتش بالى والله يا إبنى
شاب:إقرئوا الكاريكتير ده و حتعرفوا أنا كنت بضحك ليه
أنا:شفتى بقى يا ستى الناس بتجاوب إزاى بتلقائية
الفتاة:إنت عايز رأيى بجد
أنا:اه
الفتاة:أنا شايفة إنك لقيت بنت حلوة قلت تفتح معاها كلام بطريقة جديدة ,وممكن تمشى معاك وتعرف إسمها وناخد نمرة تليفونها كمان
أنا:أقسملك بالله إن ده ماكانش قصدى
الفتاة:حيث كده بقى أنا عايزة أقولك إنك أهبل,حد برضوه يمشى فى الشارع يسأل الناس هيا بتضحك ليه أنا قلت بس أسايرك شوية أشوف أخرتك أيه,دلوقتى بس ممكن أقولك أنا كنت بضحك ليه
أنا:خلاص مش عايز أعرف,أكيد ماكنتيش بتضحكى على حاجة ,دى أكيد غلطة فى تعبيرات وشك خلتنى أشوفك بتضحكى,على فكرة إنتى ممكن تكونى ماكنتيش بتضحكى ,أنا بس اللى شفتك بتضحكى و أقنعتك إنك بتضحكى ,عموماً شكراً على وقتك اللى ضيعتيه معايا
أكتشف إننى قد تأخرت كثيراً عن العمل فأقرر العودة إلى المنزل والنوم.
