مـكـالـمـة تـلـيـفـون
الساعة 2 بالليل كان محمد قاعد قدام الكمبيوتر بيلعب و منسجم، و فجأة التليفون رن.
محمد نفض و كمل لعب، لكن التليفون رن تاني.
قام محمد يشوف مين اللي بيتصل.
محمد :"دي نمرة غريبة، أما أشوف مين اللي بيتصل، آلو".
فسمع صوت رقيق بيقول :"آلو".
فقال محمد :"ايوة، مين معايا؟".
و نفس الصوت الرقيق بيقوله :"مش مهم أنا مين، أنا كنت بس عاوزة أسمع صوتك قبل ما أنام".
و قفلت السكة.
محمد بعد المكالمة الغريبة دي حس إنه جعان، فقام عمل طبق فول بالفلفل الأخضر و الطماطم، و معاه كباية شاي بالنعناع، و نسي بعدها إن فيه حد اتصل أصلا ً.
و تاني يوم، و برضة الساعة 2 بالليل، التليفون رن.
قام محمد يشوف مين اللي بيتصل.
برضه لقيها نمرة غريبة، لكن من أثر الفول بتاع امبارح هو فقد الذاكرة و ما يفتكرش إذا كانت نفس نمرة امبارح و لا لأ.
فرد محمد وقال :"آلو، مين معايا؟".
فرد الصوت الرقيق و قال :"انت لحقت نسيتني؟! دا أنا لسة مكلماك امبارح!".
فرد محمد :"أيوة يعني انتي مين و عاوزة إيه؟".
فقال الصوت الرقيق :"أنا عاوزة بس أطمن عليك و أسمع صوتك".
و بمنتهى البراءة و الاستغراب (و يمكن بشوية غباوة)، رد محمد :"تطمني عليا إزاي يعني؟! و عاوزة تسمعي صوتي لية؟!".
فرد الصوت الرقيق :"يعني تقدر تقول أنا مهتمة بيك شوية، و شخصيتك شداني جداً".
و بنسبة استغراب (وغباوة) أعلى، رد محمد :"مهتمة بيا إزاي يعني!!".
فسكت الصوت الرقيق، لكن الخط لسة مفتوح.
فقال محمد :"آلو، آلو، انتي لسة موجودة على الخط و لا إيه؟".
فرد الصوت الرقيق :"أيوة يا محمد معاك".
فقال محمد :"أومال ما بترديش و ساكتة ليه؟!".
قالتله :"أصل أنا بحب أسمع صوتك".
و راحت قافلة السكة، قال يعني عشان تشغل تفكير محمد و يقعد يفكر، لكن محمد باشا قام ضرب طبق الفول المتين مع كباية الشاي و نسي بعدهم اسمه.
تاني يوم، لكن المرة دي مش الساعة 2، لكن 2 و ربع، قال يعني عشان محمد يكون منتظر المكالمة و بيفكر فيها.
يرن التليفون، لكن عمنا محمد كان مشغول فعلا ً، بس بطبق الفول اللي ع النار، و هو لا سامع تليفون و لا نيلة، و فضل التليفون يرن لحد 2 و نص لحد ما الصوت الرقيق بقى هو اللي منتظر حد يرد عليه و يعبره.
و بعد ما جهز محمد طبق الفول، سمع التليفون بيرن، رد ع التليفون و سمع نفس الصوت الرقيق بيقوله :"كل ده بتصل، انت كنت فين كل ده؟!".
فرد عليها محمد:"مين اللي بيتصل؟!".
قالتله:"إيه يا محمد انت عندك زهايمر! مش انا اتصلت بيك امبارح! و قلتلك يا سيدي اني واحدة مهتمة بيك".
فرد عليها ببرود أعصاب :"طب عن إذنك عشان الأكل هيبرد!".
و راح قافل السكة و راح ياكل.
اتضايقت هي قوي إن محمد قفل السكة في وشها و سابها و راح ياكل، و اتصلت تاني لحد ما رد عليها.
قالتله :"إزاي تقفل السكة في وشي؟!".
قالها (و بنفس الغباوة المعتادة) :"يعني أسيب الأكل يبرد عشان أتكلم معاكي؟!".
قالتله :"أكل إيه دلوقتي؟! دا احنا في نص الليل".
قالها :"أنا بحب آكل دلوقتي. قوليلي الأول انتي مين؟ أنا لسة ما كملتش أكل، فقولي انتي مين و إلا هقفل السكة و مش هرد ع النمرة دي تاني خالص".
قالتله :"طب مش لما نعرف بعض كويس الأول!!".
قالها :"لا متشكرين، أنا كدة كويس قوي، و مش عاوز أتعرف على حد في التليفون، و بعد إذنك عشان أنا خلاص مش قادر، أنا جعان و شوية الفول و الشاي هيبردوا".
و راح قافل السكة، و قفل التليفون خالص، و جري على طبق الفول حبيبه.
